Justizia herritarrengana hurbiltzen

Uztailaren 18a: Lan-poltsen irekiera (Auzitegiko Medikuen Kidegokoa)

Uztailaren 18a: Lan-poltsen irekiera (Auzitegiko Medikuen Kidegokoa)

Uztailaren 17an, astelehena, EHAAn argitaratuko da Justizia Administrazioko zuzendariaren 2017ko uztailaren 3ko Ebazpena. Ebazpen horren bidez, ireki eta eguneratu egiten dira Auzitegi Medikuen Kidegoko lan-poltsak osatzen dituzten guztien datuak, Justizia eta Herri Administrazioko sailburuaren 2010eko irailaren 16ko Aginduan ezarritakoan oinarrituta (2010eko abenduaren 14ko 238. EHAA). Agindu horren 2.4 artikuluan adierazten da lan-poltsa hori ireki eta eguneratu egin behar dela amaitzen denean.

Eskabideak aurkezteko epea: uztailaren 18tik abuztuaren 1era.

Agiriak:

  • Administrazio honen esku ez dauden agiriak bakarrik aurkeztuko dira.
     
  • Eskainitako zerbitzuak:

    - EAEko Justizia Administrazioen kasuan, ofizioz kontatuko dira.
    - EAEtik kanpoko Justizia Administrazioen kasuan, jatorrizko ziurtagiriak aurkeztu behar dira.
     
  • Gaur egungo lan-poltsetan daudenek ez dute eskabiderik aurkeztu behar, salbu eta datu pertsonalak edo lurralde-eremua aldatu nahi badute edota agiri berriak aurkeztu nahi badituzte.
     

Lan-poltsei buruzko informazio gehiago behar baduzu, ikusi Lanpostuak Betetzea izeneko atala (enplegu publikoa).

2017ko uztailaren 14ean argitaratua. Honi buruz gehiago irakurri:  Trebakuntza eta enplegu publikoa. Iruzkin bat egin.

Abokatuen elkargoek ekitaldi aldarrikatzaileak egingo dituzte uztailaren 12an Doako Justiziaren eta Ofiziozko Txandaren Eguna ospatzeko

Abokatuen elkargoek ekitaldi aldarrikatzaileak egingo dituzte uztailaren 12an Doako Justiziaren eta Ofiziozko Txandaren Eguna ospatzeko

Abokatuen elkargoek Doako Justiziaren eta Ofiziozko Txandaren eguna ospatzen dute uztailaren 12an Espainia osoan, eta hainbat ekitaldi aldarrikatzaile gauzatuko dituzte oinarrizko zerbitzu horren garrantzia azpimarratzeko, herritar guztiek Justizia erabiltzeko aukera berak izatea bermatzen duen heinean. Urtero uztailaren 12an gauzatzen diren ekintza horien bidez, babestu eta ezagutarazi egin nahi da ofiziozko 45.300 abokatuk baino gehiagok, Doako Laguntza Juridikoaren eta Ofiziozko Txandaren zerbitzuen bidez, urtean 365 egunez eta egunean 24 orduz egiten duten lana.

Espainiako Abokatutzaren Kontseilu Nagusiak ofiziozko txandako eta doako justiziako abokatuen papera aitortzeko eta aldarrikatzeko egun gisa finkatu zuen duela zenbait urte uztailaren 12a, gizarte-bozgorailu gisa jardun eta sozialtzat eta zuzenbidez demokratikotzat jotzen den estatu batean doako justiziak duen garrantzia aldarrikatzeko xedez.

Beste jarduera batzuen artean, honako hauek gauzatuko dira abokatuen elkargoetan: doako justiziaren ikurrina altxatzea, ate irekien egunak, ofiziozko txanda babesteagatik sariak ematea, doako justiziari buruzko bakarrizketak, futbol-partidak, ibilaldiak eta lasterketak, irratsaioak elkargo-korporazioetan… Aurreko urteetan bezala, doako justiziaren eta ofiziozko txandaren kale-izendegia zabaltzeko proposamenak ere egingo dira; gaur egun, Espainiako 30 herritan dago kale, plaza edo lorategiren bat ofiziozko txandaren izena duena.

2017ko uztailaren 12ean argitaratua. Honi buruz gehiago irakurri:  Justiziarekin elkarlana. Iruzkin bat egin.

2017rako Lan Eskaintza Publikoak 3.704 lanpostu aurreikusten ditu Justizia Administraziorako

2017rako Lan Eskaintza Publikoak 3.704 lanpostu aurreikusten ditu Justizia Administraziorako

2017rako Lan Eskaintza Publikoa onartu zuen Errege Dekretuak Justizia Administrazioko funtzionario izateko 3.704 lanposturen deialdia egitea aurreikusten du; lanpostu-kopuru horretan sartzen dira, bai ohiko birjartze-tasari dagozkion lanpostuak, bai enplegu publikoa egonkortzeko eta bai behin-behinekotasuna murriztera bideratutako lanpostuak. Horrek esan nahi du eskaintzak %69 egin duela gora, 1.510 lanpostu gehiago eskainiko baitira, 2016. urtean baino (2.194 lanpostu eskaini ziren).

Birjartze-tasari dagokionez, 2017rako Estatuaren Aurrekontu Orokorrei buruzko Legeak lehentasunezko sektoretzat kalifikatu du Justizia Administrazioa, eta beraz, kidego horientzat aurreikusitako ohiko birjartze-tasa %100 izango da. Horri esker, 934 lanpostu betetzeko deialdia egingo da aurten, barne-igoerako eta txanda irekiko sistemen bidez. Hain zuzen, hona hemen lanpostu-kopuruak eta haietan sartzeko sistemak:

  • Justizia Administrazioko abokatuen elkargoa: 56 txanda irekian eta 17 barne-igoeran.
  • Auzitegi-medikuen kidegoa: 27 txanda irekian.
  • Kudeaketa Prozesal eta Administratiboko kidegoa: 312 txanda irekian eta 94 barne-igoeran.
  • Izapidetze Prozesal eta Administratiboko kidegoa: 266 txanda irekian eta 80 barne-igoeran.
  • Laguntza judizialeko kidegoa: 82 txanda irekian.
  • Horiez gain, Lan Eskaintza Publikoan, Botere Judizialaren Kontseilurako bost abokatu lanpostu ere badira.

Bestalde, Gobernuaren eta erakunde sindikalen artean duela gutxi hitzartutakoaren arabera, enplegu publikoa egonkortzeko eta behin-behinekotasuna murrizteko prozesuaren baitan, aldi baterako loturako langileek (bitarteko funtzionarioek) hiru urtean bete dituzten lanpostuen deialdia ere egingo da. Hau da, 7.000 lanpostutik gorako ezohiko deialdia egingo da 2017., 2018. eta 2019. urteen joanean, Justizia Administrazioko kidego guztietarako. Zehatz-mehatz, enplegu publikoa egonkortzeko prozesuaren baitan, lanpostuen %40 betetzeko deialdia egingo da aurten; hau da, 2.765 lanpostu betetzeko deialdia.

Hona hemen lanpostu-kopuruak eta haietan sartzeko sistemak:

  • Justizia Administrazioko abokatuen elkargoa: 12 txanda irekian eta 4 barne-igoeran.
  • Auzitegi-medikuen kidegoa: 46 txanda irekian.
  • Kudeaketa Prozesal eta Administratiboko kidegoa: 457 txanda irekian eta 137 barne-igoeran.
  • Izapidetze Prozesal eta Administratiboko kidegoa: 977 txanda irekian eta 293 barne-igoeran.
  • Laguntza judizialeko kidegoa: 839 txanda irekian.

Justizia Ministerioak bitartekotasun-tasa murriztea du xede, eta hurrengo hiru urtean tasa hori %8 baino gutxiago izan dadin lortu nahi du, erakunde sindikalekin hitzartutakoaren esparruan.

Lan Eskaintza Publiko honetako lanpostu guztiak Espainiako estatuaren eta justiziaren alorrean eskumena duten autonomia-erkidegoen artean banatuko dira. Horrenbestez, enplegu publikoa egonkortzeko eta behin-behinekotasuna murrizteko prozesuaren esparruan deitutako lanpostuak lurraldez lurralde esleitzeko, aurretik erakunde sindikalekin negoziatuko da eta autonomia-erkidegoekin koordinazioan aritu.

Justizia Administrazioko kidegoen lan-eskaintza publiko horrez gain, 2017rako Estatuaren Aurrekontu Orokorrei buruzko Legeak 100 epaile eta fiskal lanpostu betetzeko deialdia egitea aurreikusten du aurten.

2017ko uztailaren 11ean argitaratua. Honi buruz gehiago irakurri:  Trebakuntza eta enplegu publikoa. Iruzkin bat egin.

Aitaren abizenak lehentasuna izateari utzi dio

Aitaren abizenak lehentasuna izateari utzi dio

Ekainaren 30etik aurrera, seme-alaben abizenak hautatzerakoan ez da aitaren abizena lehenetsiko. Orain arte, gurasoek esaten zieten Erregistro Zibileko langileei umeari zein abizen jarri lehenengo, eta abizenen ordenari buruzko akordiorik izan ezean, aitarena lehenesten zen.

Lege berriaren arabera, ez da aitaren abizena lehenetsiko. Era horretara, akordiorik ez badago, Erregistro Zibileko langileek erabakiko dute zein izango den haurraren abizenen ordena, beti ere, haurraren interes gorena aintzat hartuta.

Orduan, nola aukeratuko da abizenen ordena?

Hiru eguneko epean gurasoek abizenen ordena adosten ez badute, Erregistro Zibileko langileek erabakiko dute zein izango den abizenen ordena, alfabetikoki, zozketa bidez, edo izenarekin bat egiteko egokiagoa den abizena lehenengo jarriz.

Edozein kasutan, gurasoek kontutan hartu behar dute lehen seme-alabari jarritako abizenen ordena gainerako seme-alabei ere jarriko zaiela.

2017ko ekainaren 30ean argitaratua. Honi buruz gehiago irakurri:  Ba al dakizu?. Iruzkin bat egin.

EAEko 1.333 emakumek tratu txarrak jaso izana salatu dute lehen hiruhilekoan

EAEko 1.333 emakumek tratu txarrak jaso izana salatu dute lehen hiruhilekoan

Etxeko- eta Genero-indarkeriaren Aurkako Behatokiak emandako azken datuen arabera, 2017ko lehen hiruhilekoan 1.333 emakume genero indarkeriaren biktima izan dira EAEn. Iazko datuekin alderatuta, %8, 1 hasi da salaketa kopurua, eta 10.000 pertsonako 11,83 kasu egon dira.  Salaketa jarri dutenen artean 897 emakumek espainiako nazionalitatea daukate eta 436 atzerritarrak dira. 

Behatokiaren presidente Angeles Carmonak begi oinez ikusi du genero indarkeriaren biktimak –emakume zein adingabeak- babesteko ezarritako neurri judizialen igoera, eta bereziki, onartutako babes-aginduen gorakada. Azken hauek, eskatutako aginduen %68 dira.

Behatokiaren datuen aurkezpenean, genero indarkeriaren aurkako Estatuko hitzarmena  gauzatzeko beharra azpimarratu du. Izan ere, presidentearen ustez, hitzarmena gauzatzea - dagozkion lege aldaketak eginaz, aurrekontuetan dagokion diru kopurua esleituz-genero indarkeriaren aurkako bide luze eta gogorrean itxaropenari ateak irekitzea da. 

2017ko ekainaren 27ean argitaratua. Honi buruz gehiago irakurri:  Genero-indarkeria. Iruzkin bat egin.